ښځه څوک ده

زرلښت حفیظ

په يوه لاس ښځه جهان زنګوي

په بل زانګو او ماشومان زنګوي

ښځه ښادي او خوشحالي ده دژوند

ښځه ډيوه ده رڼايي ده دژوند

ښځه د اخلاص او درڼا نښه ده

ښځه په ژوند کې دوفانښه ده

ښځه هوا ده په جنت کی ګرځي

هوا د ادم په محبت کې ګرځي

ښځه مريمه ده عیسی زيږوي

عيسی مړ جسم لره ساه ورکوي

ښځه اسيه وه دفرعون په کور کې

دخپل پاک خداې لار کې دنيا يي هير کړ

ښځه ملاله ده سنګر به ګټي

ښځه نازو ده مير ويس خان لويوي

ښځه اخلاص او د وفا نښه ده

ښځه په عشق کې دليلا نښه ده

که د حفيظ د شعر ديوان وګورې

ښځه ښکاره د ژوند ښکلا نښه ده